1Cor 2 | GAM | STEP | Agana kambono, na ye moi al asa woll poke ge, na nomana momo napai, una nomane kerman pai una kandja djinj mal ge na nadjill. Na God kandjiye pai mal djino dje yell.

1 Corinthians 2

Una nomane momo panda mal pillgi nadjimbon, God yembe pai ge pillgi djimbon

1 Agana kambono, na ye moi al asa woll poke ge, na nomana momo napai, una nomane kerman pai una kandja djinj mal ge na nadjill. Na God kandjiye pai mal djino dje yell. 2 Na embe yell ge, na ye boll kandja merke dje auno dje yell man, Jisas Krais ne, una ipo iko pera al to goi mal kandja ge, djino dje yell, kandja ta man. 3 Na ye boll moll poke ge, na yembena napai. Na purpur dje, kand golo moll. 4 Na kandja djill ge ne, kandja mambine dje awill ge, una kerman kandja wopake wopake djinj mal ge na nadjill. Na kandja dongall dje molo nanam kandja djindo mal pille pla yene dje na nayell, man. Na kandja dje ye awill ge, God Murble yembe ye, i pene worika ye kandja kaima dje kani. 5 Ye Jisas boll pillgi djine dje yell ge, na nomana momo pai pille ye pillgi djine dje nayell, man. God yembe yendaka ye Jisas boll pillgi djine dje yell.

God Murble awika nono nomane wopake pai mormon

6 Una God pille aglo gi djinj una mor al ge, nono kandja wopake dje aunmon pir. Makimb al kandja wopake paro ge dje naunmon, man. Makimb una kerman molo er take dje po mor ge, kambono kandja djinj mal nono kandja ge dje naunmon, man. 7 Nono God Nomane du dje kandja seke pai ge dje una aunmon. Asa kandja ge una dji napi. Ge kamasa kupill makimb napai poke ge God yene dji pille, nono kupill al po une boll wopake ta mal mopon kandja ge pai. 8 Makimb una kerman ipon mor ge kandja ge napi. Kambono kandja ge pillmaka, kupill al Iwa Kerman moro ge, ipo iko pera al nil to nagolmaka. 9 Kambono embe yei ba alla, Baibel bolo wori pai ge embe djindo,

God wal amblokun ye wori yei wal ge, wopake ta mal yei, una nomane al napi, una nalene al nakani, una dji napi. Ba yene wopake kaninj una ine dje wori yero.

(Aisaia 64:4)

10 Kandja embe pai ge seke pai. Ba God Murble wo i pene wori kanmon. Alla, God Murble wal porapora kando. God yene elle tukye seke paro mal ge, God Murble aike kando. 11 Una taimanta moya ge, yene nomane panda mal ge una ne mal kanda? Ge yene nomane taimane ge kanda. Paro mal embe, God nomane paro mal ge, una ne mal kanda? Ge yene Murble kando. 12 Nono makimb nomane pai ge naipin; nono God Murble ge ipin. Yene Murble nono boll moyaka nono God wal wopake awi ge pille kane yembon. 13 No kandja embe dje ye aunmon ge, makimb al nomane kerman paro dje naumon, man. God Murble no boll moro ge yene beke awi kandja ge, no ye dje aunmon. Alla God Murble kandjiye djindo kandja ge, no God Murble awi mor una ge dje aunmon.

14 Ba iwa ta God Murble namoya ge, God Murble kandja djinda mal iwa ge napiya. Une embe dje kando, God kandjiye paro ge dall kandja paro dje kando, pille inda naparo. God kandjiye pille inj una mor ge God Murble ga boll moro ba, iwa ge God Murble boll namoya ge, une pille inda naparo. 15 God Murble boll moya una ge wal porapora pille kune yene. Ba alla, una orko moye ge ye molo God Murble moya una ge pille kull woro piye. 16 Ge Baibel kandja embe dje bolo wori pai:

God nomane paro mal ge una ne mal kanda? God ni singare embe yemben we dje una kandja embe djine ge, una ne mal djine? Ge kune nayenda.

(Aisaia 40:13)

Ba Krais nomane paro mal nono boll paro.